AĞLAMA, ANAM, AĞLAMA.
ŞƏHİD ANALARINA İTHAF EDİRƏM.
Böyüyüb bir igid oldum,
Ağlama, anam, ağlama.
Yurd uğrunda şəhid oldum,
Ağlama, anam, ağlama.
**
Şirin laylanla böyüdüm,
Mənə deyirdin, “İgidim”,
Qulağımdadır öyüdün,
Ağlama, anam, ağlama.
**
Yeridim düşmən üstünə,
Yağını qoydum, pis günə,
Canım, ağı demə mənə,
Ağlama, anam, ağlama.
**
Axı, niyə ağlayırsan,
Qara yaylıq bağlayırsan,
Ürəyimi dağlayırsan,
Ağlama, anam, ağlama.
Mən məğlub yox, qalib oldum,
Öz yurduma sahib oldum,
Dərd-qəminə təbib oldum
Ağlama, anam, ağlama.
**
Mən vətən torpağındayam,
Bir çiçəkli bağındayam,
Anamın qucağındayam,
Ağlama, anam, ağlama.
**
Burda neçə qardaşıq biz,
Etibarlı yoldaşıq biz,
Vəfalı dost, sirdaşıq biz,
Ağlama, anam, ağlama.
**
Sən ağlarkən dolur gözüm,
Saralır bənizim, üzüm,
Canım-gözüm, budur, sözüm;
Ağlama, anam, ağlama.
**
Dayan, bir bax – qızılgüləm,
Al laləyəm, qərənfiləm,
Nəğmə oxuyan bülbüləm,
Ağlama, anam, ağlama.
**
Əyilmə, dik tut başını,
Sel eyləmə göz yaşını,
Qeyd elə, hər il yaşımı,
Ağlama, anam, ağlama.
19 dekabr 2020-ci il